"Azərtac"ın məlumatına görə, bakılılar və şəhərimizin qonaqları "Azadlıq" meydanında möhtəşəm diskotekanın şahidi olacaqlar.

31 dekabr- Dünya Azərbaycanlılarının Həmrəyliyi gününə və Yeni ilə həsr edilmiş şənliyin daha əyləncəli keçməsi üçün xüsusi dekorasiyalardan istifadə olunacaq. Artıq paytaxtın baş meydanında ən böyük – 20 metrlik yolkanın quraşdırılmasına başlanıb və gələn həftə başa çatdırılacaq. Həftənin sonuna kimi isə şəhərin mərkəzi küçələri və küçələr boyu əkilmiş ağaclar çil-çıraqlarla bəzədiləcək.

Dekabrın 31-də meydan möhtəşəm teatr səhnəsini xatırladacaq. Burada 250 kvadratmetrlik buz meydançası və 300 kvadratmetrlik sahəni əhatə edən lazer ekran quraşdırılacaq. Bu ekran 55 metr hündürlüyə qaldırılacaq. Şəhərin bayram mənzərəsinin daha cazibədarlığı üçün rəngarəng işıq effektlərindən istifadə ediləcək. Burada 18 metrlik yüksəklikdə şar ekran quraşdırılacaq.

Həmin gün saat 21-də "Fəvvarələr" meydanından start götürəcək bayram yürüşü "Azadlıq" meydanında başa çatacaq. Meydanın, eləcə də şəhərimizin digər küçələrinin görüntüləri Hökumət evinin binası qarşısında qurulacaq 60 kvadratmetrlik ekran vasitəsilə yayımlanacaq. Yeni ilin qədəm basdığı anda qeyri-adi atəşfəşanlıq olacaq. Şənlik zamanı Hökumət evinin binasından havaya aerostat tipli şarlar buraxılacaq.

Səhərədək davam edəcək konsertə Rusiya, Türkiyə və İsraildən peşəkar aparıcılar dəvət olunacaqlar. Bir sözlə, həmin gecə "Azadlıq" meydanı sürprizlərlə dolu sehrli məkan olacaq. Keçiriləcək müsabiqələr böyük maraq doğuracaq, yaraşıqlı karnaval kostyumu geyinmiş sakinlər "Azadlıq" meydanında mükafatlandırılacaqlar.

Şəhər rəhbərliyi bu gözəl şənliyin şahidi olmaq istəyən hər kəsi "Azadlıq" meydanına dəvət edir.