Sentyabr ayında Bakıda keçiriləcək Eurovision rəqs müsabiqəsinə aparıcılıq edəcəyi gözlənilən dünya şöhrətli ulduzlardan Cenifer Lopesin Bakıya gəlməsi mümkün olmayacaq. Gənclər və İdman Nazirliyi sözügedən ulduzun Bakıya gələrək, layihəyə aparıcılıq etməsi ilə bağlı yayılan xəbəri təkzib edib.
Nazirliyin mətbuat katibi Səmayə Məmmədova sözügedən müğənninin adının hallanmasına baxmayaraq, bunun şayiə olduğunu deyib. Bildirib ki, həmin ulduzun adı hələ açıqlanmayıb.
Gənclər və idman naziri Azad Rəhimov isə yarışın nüfuzlu keçirilməsi üçün bütün imkanlardan istifadə olunacağını deyib: "Bizim üçün "Eurovision 2009" rəqs müsabiqəsinin ölkəmizdə keçirilməsi böyük şərəfdir. Yarışın tamamilə yeni, nüfuzlu səviyyədə keçirilməsi üçün əlimizdən gələni edəcəyik".
Qeyd edək ki, yarışın keçirilməsi nəzərdə tutulan Heydər Əliyev adına İdman Konsert Kompleksi 7800 nəfərlik tamaşaçı auditoriyası toplamağa malikdi. //Olaylar